Divi Impact Foundation cu donacion di 15 mil florin pa Cas Speransa Nobo

Alto Vista, ARUBA - Den cuadro di HopeAruba Movement, su proyecto social - Cas Speransa Nobo - un centro di rehabilitacion pa personanan adicto na substancia, Divi Impact Foundation a haci entrego di AWG.15,000.00 pa yuda duna speransa na esnan cu a perde speransa pa motibo di nan adiccion.

Entrego di e donacion a tuma luga na Cas Speransa Nobo. Presente na e ocasion di parti di Divi Impact Foundation tabata Sra. Nathalie da Costa, Sylvania O’Niel Francis Ridderstap y Pearl Lake kende tambe a haci e entrego di e cheque. E donacion a wordo ricibi pa Miembro di Directiva di HopeAruba Fundacion Restauracion, Sr. Rafael de Cuba y Director di Cas Speransa Nobo, Sr. Shawn Blankenship.

Divi Impact Foundation su vision ta pa dedica su mes na provee servicio di calidad pa promove siguridad pa nos muchanan, fortalece famianan y haci deporte, educacion y actividadnan di arte accesibel pa comunidad, cu e meta general pa mehora calidad di bida na Aruba,” Sra. Lake di Divi Impact Foundation a duna di conoce.

Den nomber di HopeAruba Fundacion Restauracion, Sr. Rafael de Cuba a expresa palabranan di gradicimento. “Masha danki na hunta di Divi Impact Foundation. Nos ta sumamente feliz y honra cu e bunita gesto aki, pa asina colabora cu e obra di restauracion na esnan den proceso di rehabilitacion di un bida adicto na substancia. Un modelo prototipo di un forma di colabora pa atende cu e retonan social cu nos pais ta enfrenta. Divi Impact ta un ehempel y modelo pa otro empresanan pa mustra kico ta posibel ora nos pone nos esfuerzo pa traha den union y colaboracion”