Despues di 15 aña dunando atencion y alimento na adictonan ambulante “Awe Cas Speransa Nobo a bira u

Pa mas di 15 aña caba un grupo di personanan bou di e grupo “Outreach” cu ta cay bou di Cas Speransa Nobo, ta bay districtonan, entre otro Rancho, cu ta un districto conoci pa adictonan ambulante, pa duna nan cuminda, atencion y pa trece speransa.

Un di e personanan aki cu ta activo den e grupo di “Outreach” ta Sr. Rafael de Cuba, kende awe ta sumamente contento di por ofrece e personanan aki, adicto na substancia, un paso mas cerca na un bida di libertad - Cas Speransa Nobo.

Rafael de Cuba Coordinador di Grupo "Outreach"

“Pa mas di 15 aña caba nos ta bay districtonan, entre otro Rancho, conoci pa adictonan ambulante di nivel di adiccion severo. Severo, pasobra nan a perde speransa y ta pensa cu nunca mas lo tin un porta di solucion pa nan situacion. Hendenan cu a wordo rechasa no solamente di famia, pero tambe di nan mes, paso nan mes ta kere cu ta asina nan lo biba te ora nan muri. E intencion di e “Outreach” ta pa duna nan speransa. Intencionalmente nos ta haci esaki pa cuida nan. Ora nan ta sinti cu nan no ta sirbi mas, nos ta bay duna nan cuminda, atencion, paña y nos ta traha un baño portatil den e area unda nan tin e oportunidad pa baña. Tur esaki ta cosnan basico pa por tin dignidad como ser humano.”

‘Tin di nan no tin caminda di keda y nan ta baña un bes pa siman. Nos ta haciendo esaki 15 aña cu algun sponsornan cu a yuda nos na caminda y nos ta gradicido na Dios cu nunca nos a falta nada y cu awe Cas Speransa Nobo a bira un realidad. Hopi di nan ta puntra nos despues di a come y a baña, kico mas tin? Y si tin un luga unda nan por bay.”

“Awo cu Cas Speransa Nobo a bira un realidad, nos tin e siguiente paso cla pa ofrece. Awo cu e cas t’ey, “Outreach” lo sigui funciona. E problema na Aruba ta grandi y nos ta keda traha dunando nan e atencion pa asina por identifica e momento unda berdaderamente nan por ta dispuesto pa cuminsa un proceso di rehabilitacion.

Nos lo busca un sponsor pa asina integra e persona dispuesto aki den e centro den man di profesionalnan cu lo duna nan e guia na un bida nobo, un bida di libertad.” Pa mas informacion bishita www.cassperansa.org