HopeAruba ta ricibi donacion di 50 mil florin pa Cas Speransa Nobo

Den cuadro di HopeAruba Fundacion Restauracion, cu su prome gran proyecto social - Cas Speransa Nobo - un centro di rehabilitacion pa personanan adicto na substancianan, Hunta di Directiva di Aruba Bank a haci entrego di AWG.50,000.00 di donacion na proyecto di rehabilitacion Cas Speransa Nobo.

D - R Gina Habibe, Director Ehecutivo Aruba Bank

hunto cu Lisette Malmberg, Presidente

HopeAruba Fundacion Restauracion

E entrego aki a tuma luga dia 17 di mei 2017 den sala di hunta na Aruba Bank y e donacion a wordo ricibi pa Presidente di e Fundacion, Sra. Lisette Malmberg.

“Masha danki na tur e hunta di Aruba Bank. Berdaderamente nos ta sumamente feliz y honra pa ta akinan awe tardi. E modelo aki ta un prototipo di un forma di colabora cu ta algo nobo. Nos conoce sponsorship den e contexto familiar, sinembargo, nos vision di HopeAruba ta como un movemento nacional cu lo bay ta un showcase pa proyectonan colaborativo.

E structura di HopeAruba – E Movemento tin dos brasa, un brasa ta empresarionan social cu negoshinan inovativo cu ta lanta cu e solo proposito pa sostene proyectonan social. Den e otro brasa ta proyectonan social di cual Cas Speransa Nobo ta nos prome lansamento.”

“E problema di droga y di alcohol ta uno mundial. 350 miyon hende na mundo ta abusa droga of alcohol, di cual 2.5 miyon ta muri pa aña, esey kemen, 5 persona ta muri cada minuut di adiccion di droga of alcohol. Tambe den nos comunidad e ta un problema serio y nos ta hopi feliz di por a sera un Memorandum of Understanding (MoU) cu Global Teen Challenge cu tin mas cu 1000 centronan rond mundo, mas cu 25 mil cliente den nan centronan y cu ta un di e dunadonan di cuido den e area aki mas exitoso, cu un porcentahe di retencion di 87% despues di cinco aña cu a gradua di e programa.”

“Nos proyecto, den e parti empresarial social, ta Goshen Sustainable Development Corporation VBA. Esey ta bay ta un proyecto di agricultura completamente organico y su ganashi ta sirbi pa sostene e proyecto di Cas Speranasa Nobo. Den esey mi kier yama directiva di Aruba Bank danki di a sostene nos den un proyecto di mas di 1.6 miyon florin,” Sra. Malmberg a elabora.

Director Ehecutivo, Sra. Gina Habibe, a expresa cu e proyecto Cas di Speransa Nobo ta un iniciativa cu ta alinia cu Aruba Bank su brand pillar We Care cu tin un rol di sostenedor comunitario pa mas di 90 aña.

“Cas Speransa ta relaciona directamente tambe cu nos esfuersonan pa promove bienestar fisico y mental di miembronan den nos comunidad. Nos tin tur confiansa cu Sra. Malmberg por haci e proyecto aki uno exitoso. No solamente pa e parti financiero economico, pero tambe pa e manera holistico cu nan ta acerca e problema di adiccion aki na Aruba. Nos ta contento di por sostene nan den e bunita labor aki. Sra. Malmberg tambe ta un cliente di hopi tempo di Aruba Bank. Nos ta desea henter e ekipo, specialmente e clientenan di e centro nobo, tur cos bon cu e oportunidad unico aki cu Cas Speransa ta brinda esnan cu mas mester di dje den nos comunidad.”