NACION
Aruba ta un gran pais.
Aruba ta prospero
Prosperidad no ta trata di nos finansa so; e ta trata di nos relacionnan, nos salud fisico, nos bienestar emocional y mental, y nos crecemento spiritual. Hunto nos por haci Aruba prospero den tur area. Añadi bo bos na locual e kemen pa e nacion Arubiano ta prospero.
Nacion – Aruba ta un gran pais!
Un nacion prospero guia door di individuonan bon informa y podera, y organisacionnan cu balornan fuerte, cu ta obra hunto pa e bienestar colectivo
Nos ta asina bendiciona di por biba na un luga asina bunita, un luga unda e aire ta limpi, e awa ta blauw cristalino, su hendenan ta amabel y hospitalario. Aunke chikito, Aruba tin un gran destino como nacion. Un hende a yega di bisa: “Chikito ta e grandi nobo”... Nos ta di acuerdo - nos tamaño no ta determina nos potencial of nos habilidad pa contribui na mundo. Sinembargo, ora nos ta carga e peso di debe, nos hendenan ta bira mas pober, nos sistemanan ta permiti corupcion y nos spirito ta perde speransa, y lo perde nos oportunidad pa ta un gran nacion! Nos mester trata cu e asuntonan aki hunto, pa nos por crea e futuro awe, uno cu ta briyante pa cada miembro di e gran famia cu yama Aruba.
Con H.O.P.E. lo mustra
Pa nos Nacion
Un Aruba caminda e nacion:
-
Tin balornan cu ta establece un identidad cultural.
-
Ta defini prosperidad, no solamente como financiero, pero tambe fisico, emocional/mental, relacional, y spiritual.
-
Tin almanan prospero cu ta bon mayordomonan di nan rikesa y salud, cu ta comparti cu esnan pober (ta cana den amor), cu ta etico y cu ta bon productivo.
-
Tin un sistema prospero cu ta un ehempel pa e mundo di bon mayordomio di rikesa y salud nacional; un cu ta considera e pobernan y cu ta haya productividad den harmonia y igualdad den habilidad, den comportacion etico, y transcendencia spiritual.
-
Tin ciudadanonan cu ta generoso, husto, y rico den nan relacionnan y crecemento spiritual.
-
Caminda individuonan, hogarnan, gobierno, negoshinan y organisacionnan ta podera pa ta bon mayordomonan di nos ecologia, salud, y rikesa pa e generacionnan binidero.
-
Ta modela un conducta etico, ganashinan honesto, productividad aumenta, y innovacion.
-
Caminda individuonan, hogarnan, gobierno, negoshinan y organisacionnan ta co-crea y co-experencia e fundeshi di mayordomio den e curason di e ecosistema caminda nan ta opera.
RENDELL & LAY HING DE KORT-YEE
Coordinadornan HopeAruba - E Movemento
Area di Exito: NACION
Area di Enfoke, NACION ta coordina pa Rendell y Lay Hing de Kort - Yee. Durante su estudio na Hulanda den maneho di negoshi internacional, Rendell de Kort a yega na e conclusion cu mas lew di siña asisti empresarionan maximalisa ganashi e lo kier contribui na contesta algun pregunta cu parce di ta simpel pero alabes profundo cu e la encontra participando den un programa social na un area menos desaroya di Indonesia: Dicon no tur pais ta yega e nivel di desaroyo cu algun pais Europeo conoce? Dicon apesar di decadanan di programanan social nos no a logra di eradica pobresa mundial? Of crea e condicionnan pa tur persona por saca lo maximo di nan potencial? En buskeda di contesta e la continua su estudio cu un masters den economia di desaroyo na Universidad di Manchester na Inglatera. Desde cu a completa su estudio, Rendell a regresa Aruba y ta labora como
economista den e departamento di investigacion di Banco Central caminda e ta co-construi e narativo economico y projeccionnan pa Aruba. Su pasion ta pa investiga, usa datos y analisis pa yega na recomendacion y descisionnan informa.
Desde edad hoben, Lay Hing de Kort-Yee a lanta cu curiosidad pa cu e mundo di negoshi. Es mas, e la crece den curason di Caya Grandi, caminda e tawata biba patras di e negoshi di su tata. Diaramente e tawata observa kico ta pa ta un comerciante. Esaki a inspira Lay Hing tambe pa scohe un bachelor den economia comercial y un masters den finansas. E base di su carera a wordo forma na AIB BANK, cual tabata instrumental pa Lay Hing compronde mas tocante maneho di negoshinan y inversionnan. Na aña 2013, a hasi un cambio di industria bancario pa siña mas tocante e pilar economico principal di nos pais, esta turismo, dor di fungi como analista financiero y specialista den investigacion di turismo. Despues di labora 7 aña, a tuma e decision pa sigi su curason – pa ta doño di su mesun negoshi. Awe Lay Hing ta combina su pasion pa voluntarismo y e sector social cu su expertisio den conseheria pa contribui na solucionnan social cu un toke empresarial.
Conoce mas di Rendell & Layhing de Kort - Yee den "A look at Myself" Series aki.
